2015 February 14 - සමාජජාලය ලාංකිකකරණය කිරීම නොහොත් ඉරිසියාව නිර්මාණකරනකරණය ලෙස හැදින්වීම

මේ face book එකේ අන්තර්ජාලයේ සමාජ අඩවිතුල විවිධ චරිත වලට මඩ ගැසීම, ප්‍රසිද්ධියේ හාස්‍යට ලක්කිරීම, ගැරහීම හෝ විවිධ අයුරින් අවමානයට ලක්කිරීම - ඒ මඩ/කාඩ් නිපදවන පපුද්ගලයාගේ සුවිශේෂී නිර්මාණශීලිත්වයක් හෝ කුසලාතාපූර්ණ හාස්යෝත්පාදන උත්සාහයක් ලෙස හෝ හුදු විනෝද රසාස්වාදයක් ලෙස අගය කොට තැකිය හැකි දෙයක් නෙමෙයි කියලයි මටනම් හිතෙන්නේ. පුද්ගල චරිත ලක්ෂණ බස හැසිරවීම ඇදුම පැළදුම ජාතිය අනන්‍යතාව අලලා උපහාසය නරඹනන්ට රසාස්වාදයක් වුනත් ඒක ඉලක්ක කරන කෙනාට පිරිසට එහෙම වෙන්නේ නැහැ.

මෙතනදි මේවා කරන අයගේ අරමුණ සියුම්ව විශ්ලේෂණය කරලා බලන්නත් වටිනා. ඔවුන්ට කුමන අයුරකින් හෝ අනික් අයගේ අවධානය, ප්‍රතිචාරය, ප්‍රසිද්ධිය අවශ්‍යයි. ඒ අවධානය ලබාගන්න සමාජය හා අනිකා කෙරෙහිත්, තමුන්ට ජීවිතයේ හිමි අහිමි වුන දේවල් කෙරෙහිත්, ලෝකයා ඉදිරියේ බොරුවට කෙලිලොල් විහිලු සහගත ස්වභාවයක් පෙන්වමින්, නමුත් සගවාගත් නොහික්මුණු නොනිමුනු සියුම් ද්වේසයක් දුකක් යටි හිතේ තියන් - ඒ දේවල් නිර්මාණය කරනවා කියලයි හිතට අවංකව කරුණු විමසලා බැලුවොත් පේන්නේ. එමෙහත් නැත්නම් ඒ අය තමුන් කරන දේ ගැන හෝ ඒ සඳහා පෙළබවුන අදහස ගැන හෝ නුවණින් විමසන්න තරමටම බුද්ධිය මෝරලා නැති වෙන්න ඇති. කොහොම හරි ඒ මඩම, ඒ ලෙසින් තමුන්ට හෝ තමුන්ගේ පවුලේ අයෙක් කෙරෙහිත් සිදුවුනොත් තමුනුත්, තමුන්ගේ පවුලේ සාමාජිකයනුත් කොච්චර අසරණ වෙනවද, හිත් තැවුලට පත් වෙනවාද, ලැජ්ජාවට හා අපහසුතාවයට ලක්වෙනවද කියලා මොහොතක්වත් නොහිතන්න මේ තරුණ ළමයි ආත්මාර්ථකාමී වුනේ අසංවේදී වුනේ අපේ රටේ යුග ගණාවක් පවතින අපි එළිපිට කතා නොකරන අපිතුලින් අපිට හොරෙන් එන අපේ සංසකෘතියේ අපේ ආකල්ප වල වැරදි නිසයි කියලයි මට හිතෙන්නේ. මේ ගොල්ලෝ මේවා සාධාරණීකරණය කරන්නත් අරන් - ඒක විහුලුවක්, පොඩි ආතල් එකක් විතරයි, මේක අලුත් සමාජය, අපිට වුනත් අපි ගණන් ගන්නේ නැහැ අරකයි මෙිකයි බොරු තර්ක දාලා.

පරපීඩිකත්ව මානසිකත්වය ලාංකික සමාජයේ පවතින කුරිරු සංවර නොවුනු අශීලාචාර ම්ලේච්ඡ යථාර්ථයක්. ලංකාවේ තරුණයින් - හිටපු පරම්පරාවන්, හැමදාම තරඟාකාරීත්වය ජයගන්න පාවිච්චි කලෙත් මේ ආයුධයමයි. දේශපාලනය වේවා, කලාව වේවා, ක්‍රීඩාව වේවා මේ දේ ලාංකිකයන් තුල ආකල්ප තුලින් හෝ නීතිය තුලින් යහපත් කිරීමට වැඩපිළිවෙලක් තිබිය යුතුයි. අද මේ කුරිරු යථාර්ථය හාස්‍ය රසාස්වාදය ලෙස වැරදි විදියට අරුත් දැක්විලා ලාංකික තුරුණු සමාජය ඇසුරෙන් අන්තර්ජාලයේ මතුවෙන්නේ විනොදජනක මඩ විදියට නැත්නම් සරල සම්මත නිර්මාණශීලි අගය කළ හැකි ආශ්වාදනීය දෙයක් විදිහට. මේ දේම පාසැල තුල සමහර විට මතුවෙන්නේ bullying විදියට. වේදිකාවේත් රංගනය තුලත් එකිනෙකාට අපහාස කිරීමට ඔවුන්ගේ උච්චාරණ විලාශය, විලාසිතා, ශාරීරික අංග චර්‍යා, යොදාගන්නවා. මැතිවරණ වේදිකාවත් එසේමැයි. ලංකාවේ මෑතකාලීන සාහිත්‍යකරුවන්ට උගතුන්ට චිත්‍රපටි කරුවන්ට තරුණ පරපුරේ මේ දුර්වලත්වය වෙනස් කරන්න සමත් නර්මාණයක් සඳහා ආදර්ශයක් දෙන්න බැරි වෙච්ච එක අපේ ජාතියේ අභාග්‍යයක්.

දේශපාලනඥයෙකු වේවා කලා කරුවෙකු වේවා ප්‍රසිද්ධ චරිතයක් වේවා උන්කරන දේ උන් ගෙනියනවා විනා, උන්ට මේ අන්තර්ජාලයේ නොසරුප් වචනයෙන් ගරහන බණින මඩගහන කුණුහරපයෙන් පෙන්නන කිසි කෙනෙක්ට පුද්ගලිකව දෙයක් හානියක් කරල නැතුව ඇති. මේ මඩ ඊටත් වඩා ඔබ්බට ගොස් චූදිත චරිත ඉක්මවා ඔවුන් හා සම්බන්ධ පවුල් වල සාමාජිකයන්ටත් එල්ල කිරීම ඉතාම නීච ජඩ වැඩක්. එමගින් ඒ පවුල් සමාජිකයන් මානසිකව පීඩාවට පත්වීමත් සමාජය ඉදිරියේ ඉතා දරුණු අපහසුතාවයකට පත්වීමත්, එකිනෙකා අතර අමතර ගැටුම් පසුකාලිීන දරුණු කඩා වැටීම් ඇතිකරවන්න තරම් සංකීර්ණ වෙන්නත් පුලුවන්.

වරදට එරෙහිවීම හෝ ඊට විරුද්ධව නීතිය ක්‍රියාත්මක කළයුතුයි කියන මතය තුල තියෙන හැඟීම වෙන්නේ අහිංසකයන් දුබලයන් හිංසාවෙන් රැකගැනීමත්, උස්මිටි ඇති හැකි බේදයෙන් තොර හැමෝ්ටම යහපත් සාදාරණ සමාජයක් ස්ථාපනය කිරීමත් කියන දේ. ඊට හාත්පසින්ම වෙනස් අරමුණක පිහිටන මේ මඩ ගැසීමේ කලාව හා හාස්‍යකරණය, ඒ තුල සත්‍ය සගවා කරණ පළිගැනීමත්, කලදුටුකල වල ඉහගෙන තමුන්ගේ ඉරිසියා සහගත හැගීම් සමාජය ඉදිරියේ සාදරණීකරණය කිරීමත් කියන කිලිටි චේතනාවන්ගෙන් යුක්තයි. ඒවා වැරදි ආදර්ශයන් ලෙස පිළිකුලෙන් බැහර කළ යුතු දේවල්. විවේචනය කියන තැන සමාජ ප්‍රගමණයට යහපතට අනිවාර්යෙන් අවශ්‍ය නමුත් අද බොහෝ විට ලාංකිකයන් අතර අන්තර්ජාලයේ සිදුවෙන්නේ කැත විදිහට සත්‍ය අවස්ථාවාදීව උලුප්පා හෝ අවස්ථාවාදීව තනුක කර, එහෙමත් නැත්නම් සත්‍යය එහෙම් පිටින් විකෘත්ති කර තමුන්ගේ පහත් අරමුණු වෙනුවෙන් නිර්මාණය කරණ ලද දරුණු මඩ යොදා ප්‍රසිද්ධියේ අනෙකා ගැරහීමට ලක්කර තමුන්ගේ ජඩ හැගීම් කණ්ඩායමක් ලෙස සාධාරණීකරණය කරගන්න එක කියලයි මට හිතෙන්නේ. ලාංකිකයෝ විදියට අපේ තියෙන හොද වගේම මේ වගේ ඉතාම කැත පහත් වැඩ නවත්තන්නත් - ඒ දේ වැරදියි කියන පණිවිඩය තරුණ පරපුරට සමාජගත කරන්නත් කවුරුහරි ඉදිරිපත් වෙන්න ඕනේ. අපි වෙන කිසිම සමාජයක, සංස්කෘතියක මේ වගේ කැත විදියට පුද්ගලයින් චරිත අලලා නිර්මාණශීලි හෑල්ලු කිරීම් ගැරැහීම් අභූත චෝදනාවන් පාච්චල් කිරීම් මඩ ගැසීම් අසංවර ලිංගික අවමානයන් දකින්නේ නැහැ ලංකාවේ සමාජ වෙබ් අඩවි තුල ඇර.

මේ වීරයෝ අන්තර් ජාලයේ අනන්‍යතාවය හගවන් මේ දේවල් කලාට ඇත්ත අපරාධකරුවන් සමග මුහුණට මුහුණලා හෝ නීතිය ඉදිරියේ සටනකට තමුන්ගේ කාලය දනය වියදම් කරන් රට වෙනුවෙන් කියලා ඉදරිපත් වෙනවා, සංවිධානය වෙනවා, පෙලගැහෙනවා නම් දැකලානම් නැහැ.