හිතවත් ගරු Maithripala Sirisena ජනාධිපතිතුමනි, Ranil Wickremesingheඅගමැති තුමනි,
ඔබ දැනටමත් දන්නවා ඇති මඩකලපුවේ සින්නතම්බි උදය ශ්‍රී නැමැති තරුණිය අප ලෝක උරුමයක් වන සීගිරිය කැටපත් පවුරේ - කිසියම් සටහනක් - මාධ්‍ය වාර්ථාකරන ලෙස ("Love U Uthaya") හෝ ඊට සමාන යමක් කුරුටුගෑමට ගොස්, බලධාරීන්ට අසුවී වරද පිළිගත්තාය. සමහරුන් පවසන ලෙස මාධ්‍ය ආදර පණිවිඩයක් ලිව්වායැයි වැරදියට තොරතුරු ප්‍රචාරය කර ඇත. සමහර තොරතුරු අනූව ඇය (T Uthaya) ලෙස ඇයගේත් ඇයගේ හිතවතියකගේත් නම ලියා ඇත. මෙහිදි ලිව්වේ කුමක්ද යන්න කිසිම වැදගැම්මකට නැති දෙයක් බව ඔබ මම අපි සැවොම දනිමු. කෙසේමුත් ඇය කුණුහරුප ලියා නැත. සීගිරි කැටපත් පවුරේ මෑතකාලීනව ගිය තරුණ පිරිස් නොයේක් සැබි අසැබි දේ ලියමින් පව්ර කැත කර ඇති අයුරු අපට ඕනෑ තරම් දැකිය හැක. නමුත් එය වරද දුටුවිට ක්‍රියාත්මක වීම වැලකීමට හේතුවක් නොවේ යන්න නීතිගරුක අප සැම එකඟ වෙන කරුණකි.
මේ සිද්ධිය පිටුපස මීට වඩා මානුෂීය යථාර්තයන්ද පැවතිය හැක. නූගත්කම භාෂා දැනුම නැතිකම හා දිළිදුභාවය ඒ අතර විය හැක. ඇතැම් වාර්ථා අනූව ඇය දඩය ගැන අසා එය රුපියල් ලක්ෂයකුත් වසරක සිරදඩුවමක් බව බලධාරීන්ගෙන් දැන බියට පත්ව - සීිගිරි ගලෙන් පැන සියදිවි නසා ගැනීමටද උත්සාහ කර ඇත. ඇයගේ පියා මියගොස් යැයි පවසන අතර මව කඩයප්පම් කරන දිළිදු කාන්තාවක් බවටත් වාර්ථා ඇත. කෙසේ හෝ අවසානයේ ඇයට අධිකරණයෙන් අවුරුදු දෙකක සිර දඩුවමක් දී ඇත.
ඒ එසේ කල කාරුණිකව කරුණු විමසා බැලීමේදී කරුණු ගණනාවක් ප්‍රත්‍යක්ෂ වනු ඇත. මේ දරුවන් කුඩා කල - යුද්ධයට මැදිව, දරිද්‍රතාවයට මැදිව, සමාජ දැනුවත්කමකින් තොරව උගත් දැනුවත් සමාජයක දැක්මකින් ආකල්පයකින් තොරව හැදී වැඩී ඇත. එමෙන්ම ක්‍රමවත් කනිෂ්ඨ පාසැල් අධ්‍යාපනයක් ලැබීමටද බොහෝ විට කටයුතු සැලසී නැතුව ඇත. එසේම ඒ සදහා අවශ්‍ය මානසික හා භෞතික පරිසරය මීට වසර කිහිපයටකට පෙර මනම්පිටිි පාලමෙන් එපිට බොහෝ පෙදෙස්වල නොවූ බව පුලතිසිපුරවරයෙන් පහලවූ ජන නායකයෙක් වන ජනාධිපතිතුමාහටත් අත්දැකීමෙන් පොහොසත් අගමැතිතුමාටත් අමුතුවෙන් පැහැදිළි කලයුතු නැත. පසුගිය සමයේ ධෛර සම්පන්නව අපරිමිත කැපකිරීමෙන් දිවි පරදුවට තබා සටන් කල සෑම දෙනාහටම පින්සිදු වන්නට වල්වැදී ම්ලේච්ඡත්වය විසින් ගිලගනිමි්න් සිටි ඒ දරුවන්ට ඔවුන් සැගවී සිටි කැලෑ වලින් එළියට පැමිණ අලුත් ලෝකයක් දෙස බැලීමට අවස්ථාව විවර වී ඇත. අද ඔවුහු නිදහසේ රට වටා ඇවිදිති. පෙර නොදුටු අලුත් ලෝකයක් දකිති. එහි හැසිරිය යුතු විදිය සීමා මායිම් පිළිබද - ඔවුහු බොහෝ විට නොදැනුවත් වෙති.
මාධ්‍ය ඔස්සේ අපට මේ තරුණ දරුවාගේ පවුලේ මෙන්ම මවගේ විස්තර අසන්නට දකින්නට යෙදුනේය. සමහර විට දැනටමත් ඔබතුමා මේ සම්භන්ධව දැනුවත් වී ඇත. මේ වයසේ ගැහුණු ළමයෙක් ඔවැනි වරදකට දෙවසරක් හිරගතකිරීම නීතිය අතින් සාධාරණ වුවද මානුෂික අතින් ඇගේ පවුලේ පසුබිම ඇගේ අධ්‍යාපන මට්ටම හා සමාජ මට්ටම බලන කල ඉතාම අවසනාවන්ත සිදුවීමකි. නොදැනුවත් කමින්ම මේ දේ කලා යන්න සිතීමට ඇති සාධක බොහෝ වෙයි. මේ සිද්ධිය කියවීමේදි තවත් ප්‍රත්‍යක්ෂ වන කරුණක් නම් - ඇය වහා වරද පිළිගෙන ඇති බවයි. ධනය බලය දැනුම හා අඩුම තරමින් ගුරුහරු දීමට සමත් විශ්වාසවන්ත අසල්වැසි කාරුණික හිතවත් කිසිවෙකුත් හෝ ඇය වෙනුවෙන් ඉදිරිපත් වූයේ නම් කෙසේ හෝ නිදහස වෙනුවෙන් යම් සටනක් කරන්නටත් ඇය හා ඇගේ හිතවතුන් පිරිස පෙළඹෙනු ඇත.ඔබ අප දන්නා පරිදි මෙවැනි දේට විරුද්ධ වෙන්නට නැත්නම් මෙවැනි අය වෙනුවෙන් ඉදිරිපත් වන පිරිස බොහෝ අල්ප වෙයි. ඔවුන්ගේ ඝෝෂාවද ඔවුන් කෙරෙහි සමාජ අවාධානය හා කාරුණිකත්වයද අල්ප වෙයි. දුෂ්චරිතවත් නිලියකට හෝ දූෂිත දේශපාලනඥයෙකුට ඇති මාධ්‍ය අවධිය මොවුන් වෙනුවෙන් නැති තරම් වෙයි. වාර්ථා වන ආකාරයට ඇය ඉතා දුප්පත් පැල්පත් වාසී මවකගේ දියණියකි.ඇය වෙනුවෙන් කතා කරන්නට ඇයගේ දුප්පත් කමද, ඇයගේ ආකර්ෂණීයත්වයේ දුබල කමද, ඇයගේ කර්මයද, ඇය වටා සිටින දිළිදු කුරිරු පුරුෂාධිපත්වයට යටවුනු නූගත් සමාජයේ් කුහකත්වයද බොහෝ විට ඉදිරිපත් නොවනු ඇත.
පහුගිය කාලය තුල විවිධ මිනී මැරුම් නඩු වලට සම්භන්ධ යැයි අධිකරණයෙන් වැරදකරුවන් කල - ඔබ අප සැම දන්නා ප්‍රසිද්ධ දූෂිත පුද්ගල චරිත සදහා විිවිධ හේතු යටතේ ජනාධිපති සමාව දීමට තීරණය කරන ලදී. නමුත් මට දැනෙනා ලෙසට මගේ නැගණියගේ වයසට ආසන්න වයසක ගතකරන මෙම දිළිදු තරුණියට කරුණු හොයා බලා ජනාධිපති සමාවක් දෙන්නට කටයුතු කිරීම ඔබ කෙරෙහිත් යහපාලනය කෙරෙහිත් විශ්වාසය තැබූ සාමය සමාදනය සමානාත්මතාව හා සමාව අගය කරන කාරුණික කවුරුත් ඉහලින්ම අගය කරන දෙයක් වනු ඇතැයි මම විශ්වාස කරමි.
ජනාධිපති තුමනි, අගමැතිතුමනි, ඔබටත් රටටත් ජය පතමින් නවතිමි.
No comments:
Post a Comment